LAOAG CITY – Natay ti maysa nga indibidual kalpasan a nadungpar ti maysa nga eroplano iti Denver International airport.
Basar kadagiti otoridad, kabayatan a dumaldalyasat ti Frontier Airlines nga Airbus A321 ket kellaat a bimmallasiw iti runway iti eropuerto ti maysa a lalaki.
Naammoan a tumalaw koman ti eroplano manipud Denver nga agturong iti Los Angeles no sadinno nga adda ti nakalugan a 224 a pasahero ken pito a crew members.
Gapu iti napasamak, naitantan ti flight ti eroplano ken naiyakar dagiti nasao a pasahero iti sabali nga eroplano.
Nauram ti paset ti cabin ti eroplano isut gapuna nga insigida a nagresponde dagiti bumbero ken dagiti emergency crew.
Iti baet a saanen a naiparuk-at ti pakabigbigan ti biktima ket mamati dagiti otoridad a maysa nga empleado met laeng ti eropuerto daytoy.
