LAOAG CITY – Inlawlawag ni Mayor James Bryan Alcid a maipalubosto met laeng nga agoperar dagiti pasdek negosio apaman a maitedda dagiti kurangda a dokumento.
Daytoy ti inrakurakna kalpasan nga adda ti uppat a pasdek negosio ditoy siudad a napaserraan iti kallabes.
Inbatadna a dagitoy dagiti negosio a naipaayan ti naunday a panawen tapno ipasa dagiti kasapulan a dokumento.
Masdaaw isuna no apay saanda a nakaiproseso iti baet nga asideg ken silulukat met a kanayon ti city hall a pakaiprosesoan dagitoy.
Innayonna a mangisayangkatda ti imbestigasion kadagiti empleado ti city hall a maipagarup nga agiprosproseso dagiti dokumento dagiti negosiante.
