LAOAG CITY – Inrakurak ni Sen. Panfilo “Ping” Lacson a no dadduma ket mapanpanunotna ti agikkat kas senador gapu kadagiti mapaspasamak a tension ken riribok iti Senado.
Inbatad ni Lacson a nakalidliday para kenkuana ti panagbalbaliw ti panagkita ti publiko iti Senado maidasig iti Kamara de Representantes.
Inlawlawagna a dati ket kitkitaen ti Senado kas “big brother” wenno nangato a tukad iti check and balance iti gobierno ngem arig nagbaliwen iti agdama.
Kunana a naipakaammona kadagiti sumagmamano a kaduana nga agpanpanday linteg ti posibilidad a panagikkatna ngem inallukoyda isuna a saanna daytoy nga ituloy.
Iti baet daytoy, kuna ni Lacson nga agtultuloy a mangnamnamada iti maaw-awagan a Senate minority bloc a maisubli ti respeto ken kredibilidad ti institusion iti babaen ti naur-urnos a trabaho para iti publiko.
Maipalagip a naaddaan ti tension iti Senado kalpasan ti panagatendar ni Sen. Ronald “Bato” dela Rosa iti session hall kalpasan ti nabayag a panag-absent mainaig iti warrant of arrest manipud iti International Criminal Court (ICC) a nagbalin a maysa kadagiti namunganayan ti diskusion iti uneg ti Senado.
