LAOAG CITY – Saan nga iwalin ti Bureau of Immigration (BI) ti posibilidad a nakaruaren ditoy Pilipinas ni Senador Ronald dela Rosa kagiddan ti immunan a panagtalawna iti Senate custody.
Inbatad ni Bureau of Immigration spokesperson Dana Sandoval nga agtaltalinaed a nakalukat ti posibilidad ti panagusar dagiti backdoor channels wenno limed a pagruaran a rummuar iti pagilian kas kadagiti nasulinek a pantalan.
Kunana a kanayon a kitkitaen ti Bureau of Immigration ti kastoy nga anggulo tunggal adda ti kapada a situasion.
Nupay kasta, inpasigurado ni Sandoval a bantay-sarado dagiti maibilang nga illegal migration corridors iti tulong ti Philippine National Police, Philippine Coast Guard ken dagiti lokal a gobierno.
Naammoan a no adda ti gandat a panaglibas, insigida nga agalerto ti Bureau of Immigration pakairamanan ti pakabigbigan dagiti malaplappedan nga indibidual nangruna no adda dagiti gangannaet.
Basar iti opisial a rekord ti Bureau of Immigration, nagtalinaed nga awan ti nairekord a panagruar ti pagilian ni Sen. Dela Rosa.
Daytoy ket iti baet ti maipatpatungpal nga Immigration Lookout Bulletin Order kontra iti senador.
Inpasigurado ni Sandoval a no makita ni Dela Rosa kadagiti eropuerto ket insigida nga ipakaammoda kadagiti law enforcement agencies para iti maiyannatop a tignay.
