LAOAG CITY – Kinontra ni Senador Risa Hontiveros ti dinakamat ni Senador Robin Padilla mainaig iti panagusar ti “Force Majeure” a posible a pagibasaran tapno palubosan ti remote participation dagiti Senador kadagiti plenary sessions iti Senado.
Bimmara ti diskusion mainaig iti gakat a baliwan ti senate rules kalpasan a nag-walk out dagiti minority bloc idi Mayo 26 kalpasan ti maiyal-alisto a pannakaaprobar ti remote participation wenno online attendance dagiti Senador iti plenario.
Iti katengngaan ti kontrobersial, inlawlawag ni Padilla ti kayatna a saoen ti “force majeure” ken dinakamatna pay dagiti krisis a mapaspasaran ti sangalubongan.
Kunana a ti force majeure ket pakairamanan dagiti pasamak nga awan ti kontrol ti tao kas kadagiti dagiti bagyo, layus, gingined, gubat, terorismo ken dadduma pay nga emerhensia.
Inpettengna ti posibilidad ti nakaro nga El Niño phenomenon iti maudi a paset ita a tawen agingga iti umuna a paset inton sumaruno a tawen a mabalin a mangitunda ti nakaro a panagtikag iti pagilian
Kabayatanna, binigbig met ni Hontiveros a saan a maibilang a force majeure dagiti pasamak a dinakamat ni Padilla.
Inlawlawagna a dagiti isyu kas ti gubat iti Middle East, tension iti nagbaetan ti China ken Taiwan pakairamanan ti climate change ket nabayagen a mapaspasamak ken saan a nagbalin a rason idi a mangisayangkat ti online work ti Senado.
Innayon pay ni Hontiveros a basar iti Senate Rules a palubosan laeng ti videoconferencing no panawen ti national emergency kas idi napasamak ti COVID-19 pandemic.
Iti agdama, awan pay ti sungbat ni Senador Padilla mainaig iti reaksion ti Senadora.
