LAOAG CITY – Natay ti maysa a lalaki nga agdeldeliber ti itlog iti napasamak a pammaltog iti Barangay Bomitog iti ili ti Banna.
Ti biktima ket agtawen ti 43, naasawaan, taga Barangay Binaratan iti ili ti Sarrat ngem agdama nga agnanaed iti Barangay Root iti ili ti Dingras.
Segun ken ni Police Major Exequiel Giovanni Doloroso, ti chief of police iti ili ti Banna, mapan koma agdeliber ti itlog ti biktima iti ili ti Nueva Era agingga iti ili ti Pinili a nakalugan ti van idi pinaltu-paltugan dagiti suspek a maipagarop a nakalugan ti motorsiklo.
Inlawlawag na a ti nakapasamakan ti krimen ket adayo ti babbalay, ngem idi nakangngeg dagiti tattao iti lugar ti putok ti paltog ket sinirpat da ti namnamaen da a nakangngegan da ket ditoyen a nakita da ti nakasardeng a van iti tengnga ti kalsada ken nakita da ti immadayon a motorsiklo a mabalin nga isu ti nagluganan dagiti suspek.
Kuna pay ni Doloroso a nakarekobre da ti tallo a basyo ti saan pay a masinunuo ti kalibre na a paltog iti nakapasamakan ti krimen.
Innayon na a possible a pinagsardeng nga immuna dagiti suspek ti van sakbay a pinaltu-paltugan da ti biktima a nangitunda ti pannakatay na a dagus gapu kadagiti sinagaba na a sugat iti nagduduma a paset ti bagina aglalo iti ulo na.
Mainaig iti daytoy, nadakamat ni Doloroso nga addan ti kitkitaen da nga anggulo ngem saan da pay a mabalin nga idetalye ken ipublikar tapno saan a maapektaran ti isaysayangkat da nga imbestigasyon.
Iti agdama, agtultuloy ti naiget nga imbestigasyon dagiti otoridad tapno maamoan ti motibo ken ti kinatao dagiti suspek iti napasamak a pammaltog.
