LAOAG CITY – Inpasigurado ni P/Lt.Col. Ryan Retotar, Hepe ti Laoag City Police Station a saan a maapektaran ti pannakaiwayat dagiti dadakkel nga aktibidad iti baet nga adda ti panagkurang ti personnel ti Philippine National Police ditoy siudad ti Laoag.
Segun kenkuana, adda dagiti naka-deploy a kapulisan kadagiti nagduduma a tourist police unit pakairamanan dagiti kangrunaan a kalsada ken pagpasiaran ditoy siudad.
Inbatadna nga adda ti augmentation-da manipud iti Provincial Command tapno tumulong nga agbantay iti panangpatalinaed ti linak, urnos ken talna.
Malaksid iti daytoy, kunana nga adda pay ti force multipliers a nakasagana a tumulong kadagiti kapulisan para iti naan-anay a seguridad dagiti umili.
Kunana nga awan ti problema kadagiti panagresponde kadagiti disgrasia ken dadduma pay nga operasion ti kapulisan basta saan nga aggigiddan dagitoy a mapasamak wenno maiwayat.
Maipalagip nga inpakaammo ni P/Lt.Col. Retotar nga adda ti 124 a Philippine National Police personnel iti agdama ditoy siudad ti Laoag no sadinno a ti tunggal pulis ket 900 nga umili ti bantayanda.
Naammoan a rumbeng nga adda iti 224 a Philippine National Police personnel tapno ti maysa a pulis ket 500 a tao ti bantayanna rason a kasapulan ti 100 a Philippine National Police personnel wenno 45% pay.
