LAOAG CITY – Inbatad dagiti eksperto a ti nakaro nga stress ket saan laeng a makaapektar iti panunot ken emosyon ti maysa a tao no di ket uray iti salun-at ti kudil.
Basar kadagiti eksperto, maysa kadagiti naipagagangay a senyales ti maaw-awagan ti “stressed skin” ket bigla a panagado ti pimples wenno acne breakouts.
No nangato ti lebel ti stress, ngumato met ti produksyon ti sumagmamano nga hormones a mabalin a mangpakaro kadagiti problema iti kudil.
Makita pay iti stressed skin iti babaen ti lumablabbaga wenno arigna awan ti ganaygay na a kudil.
Kuna pay dagiti doktor a ti kinakurang ti turog ken kanayun a pannakabannog ket mabalin a mangpakapuy iti natural a panagrenew dagiti selula ti kudil.
Ibalbalakad dagiti eksperto iti publiko a pagtalinaeden a balanse ti diyeta, uminom ti umdas a danom, maturog ti saan a nababbaba ngem pito nga oras iti kada rabii ken mangilatang ti oras tapno makainana ken liklikan ti kanayun a pannaka-stress.
