LAOAG CITY – Nangipila ti resolusion ni Senate President Pro Tempore Win Gatchalian tapno paimbestigaran ti makapadanag a masansan nga idekdeklarar a red ken yellow alert ti National Grid Corporation of the Philippines (NGCP) a mangituntunda ti panag-brownout iti Luzon ken Visayas.
Iti Proposed Senate Resolution 425, inpetteng ni Gatchalian a ti prediksion ti posible a panagpigsa ti El Niño iti maudi nga uppat a bulan ti tawen agingga Enero iti sumaruno a tawen ket mabalin a mangpakaro iti kinakurang ti suplay ti kuryente iti pagilian.
Basar iti datos manipud Mayo 12 agingga Mayo 31, naipan ti Visayas grid iti red alert iti uneg ti 22 nga interval hours ken iti yellow alert iti uneg ti 93 nga interval hours.
Iti kapada a panawen, ti Luzon grid met ket nakapasar ti red alert iti uneg ti 27 nga interval hours ken yellow alert iti uneg ti agarup 5.5 interval hours.
Segun iti Senador, karaman iti tutukan ti imbestigasion ti pudno a situasion ti suplay ti kuryente iti pagilian, panangipasigurado iti kinatibker ti grid, panangpasungbat kadagiti aglablabsing nga stakeholder, panangipasigurado a sumursurot dagiti generation companies iti kangatoan a pagannurotan ti industria, panangbukel ti epektibo nga interbension ti gobierno ken naiget a panangipatungpal dagiti linteg iti enerhia pakairamanan ti demand-side management iti babaen ti Energy Efficiency and Conservation Act.
