LAOAG CITY – Usaren nga ebidensia ti sumagmamano a pamilia dagiti mapukpukaw a mammallot ti kuarta a maipagarup nga inpaay kadakuada ti abugado ni Atong Ang.
Inbatad ni Dianne Loyola, maysa kadagiti kabagian dagiti mapukpukaw a mammallot, nakaawat isuna ti P30,000 manipud iti abugado ni Ang a ni Atty. Caroline Cruz idi Abril kas tulong kadakuada.
Rumrummuar a sinaggaysada dagiti maseknan a pamilia tapno saanen nga agatendar kadagiti panagdengngeg iti kaso kontra ken ni Ang a maitudtudo a mastermind wenno utek iti pannakapukaw dagiti mammallot a sumagmamano a tawenen ti napalabas.
Kuna ni Loyola nga adda ti dadduma pay a dakdakkel ti gatad ti maaw-awat ken adda pay dagiti nakaikabil iti payroll.
Malaksid iti panangipaay ti kuarta, intugot pay dagiti pamilia dagiti mapukpukaw a mammallot iti farm ni Ang tapno ag-swimming ken inranada iti mismo nga aldaw ti panagdengngeg kadagiti kaso.
Maipalagip nga idi Biernes idi pormal a nagipila ti reklamo nga obstruction of justice da Loyola ken dadduma pay a pamilia dagiti mapukpukaw a mammallot kontra ken ni Cruz iti Department of Justice.
