LAOAG CITY – Insubli ti Department of Justice (DOJ) iti Philippine National Police – Criminal Investigation and Detection Group (PNP-CIDG) ti reklamo nga obstruction of justice kontra ken ni Senador Robin Padilla.
Daytoy ket mainaig iti panagtulong daytoy tapno nalimed a makatalaw ni Senador Ronald “Bato” dela Rosa iti Senado idi Mayo 14.
Inlawlawag ni Justice Secretary Fredderick Vida a nagkiddaw ti agim-imbestigar a prosecutor ti nayon a dokumento ken nasapataan a salaysay manipud iti sumagmamano nga indibidual a karaman iti kaso.
Inbatadna a nangipatuloden ti Department of Justice ti maysa a surat ken ni Atty. Jimmy Bondoc, abugado ni Dela Rosa tapno agkiddaw ti panangilawlawag iti sumagmamano a rakurak daytoy mainaig iti panangipatungpal daytoy ti warrant of arrest kontra iti Senador.
Maipalagip a ni Sen. Dela Rosa ket addaan ti warrant of arrest manipud iti International Criminal Court (ICC) nga in-unseal idi Mayo 11 kagiddan ti panagpakitana iti Senado kalpasan ti sumagmamano a bulan a panag-absent daytoy.
Naipadalan isuna ti protective custody ngem saan a nagbayag ket palimed a naglibas sumagmamano nga oras kalpasan ti napasamak a riribok ken panagpinnutok iti Senate building.
