LAOAG CITY – Nagdinnungpar ti mini container van ken maysa a kotse iti Barangay Balacad ditoy siudad ti Laoag.
Segun ken ni Dr. Melvin Manuel, mangidadaulo ti City Disaster Risk Reduction and Management Office ditoy siudad, ti mini container van ket agturong nga agpa-abagatan idinto a ti kotse ket agturong met nga agpa-amianan.
Inbatadna a gapu iti kinapigsa ti impact ti panagdinnungpar ti dua a lugan ket nagbaliktad ti mini container van.
Inlawlawagna nga insigida nga inikkatda ti dua a behikulo iti kalsada tapno saan a mangitunda ti nairot a taray ti trapiko.
Kunana a naitaray iti ospital dagiti amin a nakalugan iti mini container van ken kotse.
Kabayatanna, inpakaammo ni Mrs. Ginalyn Doronia residente iti asideg iti nakapasamakan ti disgrasia ken maysa kadagiti nakakita iti napasamak nga adda ti tallo a nakalugan ti mini container van no sadinno dua a babbai ken maysa a lalaki idinto a baket ken lakay ti nakalugan iti kotse.
