LAOAG CITY – Nagtalinaed a normal ti lebel ti danum iti Padsan River ken nasayaat met dagiti karayan ditoy siudad ti Laoag basar ken ni Dr. Melvin Manuel, mangidadaulo ti City Disaster Risk Reduction and Management Office.
Basar iti monitoring ken report-da, awan ti nalayus a lugar iti siudad ken awan met ti dakes a napasamak kadagiti residente.
Mainaig iti daytoy, nakikoordinar ti City Disaster Risk Reduction and Management Office iti tunggal barangay ditoy siudad ti Laoag no sadinno a nagpakdaarda nga agridam dagitoy no makapasarda ti layus gapu iti awan sarday a panagtudtudona.
Inpakaammona a manipud iti Agosto 1 agingga Agosto 9 ket addan ti 247 millimeters manipud iti 600 millimeters a rainfall basar iti Philippine Atmospheric, Geophysical and Astronomical Services Administration (PAG-ASA).
Nagballaag daytoy a saan pay laeng a tumappog iti kabaybayan dagiti mangngalap ken agtalinaed a natalged dagiti residente iti pagtaenganda.
Kabayataanna, inbatad met ni Dr. Melvin Manuel, mangidadaulo ti City Disaster Risk Reduction and Management Office iti siudad ti Batac a nasayaat ti kasasaad iti siudad ti Batac no sadinno nga awan ti nagbakwit a residente ken saan a ngimmato iti above water level iti Quiaoit River.
Kunana a sakbay iti iduduprak ti bagyo, mangisaysayangkatda ti clean-up drive ti city government ken kadagiti amin a barangay nga i-monitor ken agdalusda partikular dagiti basura.
Gapu iti daytoy, naikkat dagiti naisullat a kayo a nagresulta iti saan a panaglayus iti lugar.
Malaksid iti daytoy, awan met dagiti nai-report a nadadael nga imprastraktura ken agrikultura kasta pay nga awan ti nairekord a nasugatan a residente.
Kabayayatanna, manarimaan ti panag-monitor-da kadagiti nababa wenno high risk a lugar nga adda latta ti maisullat kadagiti pagdalanan ti danum iti nagduduma a lugar iti siudad kas iti Barangay Ricarte, Quiling Norte ken Balicat pakairamanan ti Bagsakan.
