LAOAG CITY – Silulukat ni Senate President Pro Tempore Sherwin Gatchalian a makisarita iti grupo ni Senador Alan Peter Cayetano tapno urnosen ti riribok iti liderato ti Senado a nagbalin a rason ti pannakaitantan ti sumagmamano a trabaho ti Senado.
Inbatad ni Gatchalian a nakasagana daytoy a makisarita kadagiti amin a Senador, aniaman ti pakaibilanganda a grupo tapno maisubli ti normal nga operasion ti Senado.
Kunana a napateg ti panagsarita tapno maresolbar ti nagbaetan ken makapokus manen iti panangputar kadagiti linteg para iti publiko.
Nangrugi ti tension kalpasan a nagudua ti dua a paksyon ti Senado, ti 12 a miembro ti mayorya a pakaibilangan ni Gatchalian ken ti 10 a miembro ti minorya nga idadauloan ni Cayetano.
Gapu iti daytoy, saan a natuloy ti sesyon kadagiti naglabas a lawas a nangitunda ti pannakaitantan ti pannakaipasa dagiti nakapenpen a linteg.
Maipalagip a naelektaran ni Gatchalian kas Senate President Pro Tempore kalpasan nga indeklarar a bakante ti amin a posision iti Senado.
Basar iti Senate rules, isuna ti tumaktakder nga Acting Senate President no awan ti nakatugaw a Presidente ti Senado.
Kabayatanna, inpetteng ni Cayetano iti maysa a Facebook livestream a kasapulanda a pagsaritaan no asino ti pudno a lider ti Senado.
Kimmaro pay ti isyu kalpasan a nangipeksa ti sumagmamano nga opisial ken dati a Presidente ti Senado a nasken a makibiangen ni Presidente Ferdinand Marcos Jr. tapno maresolbar ti krisis ken maisubli ti normal a taray ti lehislatura.
Segun kadakuada, napateg a bumallaet ti Presidente tapno saan a maitantan ti napapateg a responsibilidad ti Senado pakairamanan dagiti nakapenpen a linteg ken oversight functions ti gobierno.
Nangipeksa pay ti panagamak dagiti agpapaay iti Senado iti agtultuloy a panagginnura dagiti agpanpanday linteg a mangituntunda ti pannakaulaw kadagiti pammilin ken nayon nga stress iti trabaho dagitoy.
