LAOAG CITY – Manarimaan ti pannakikoordinar ni Mayor Virgilio Calajate iti ili ti Badoc iti Provincial Government of Ilocos Norte ken iti national government para iti nayon a tulong kadagiti mangngalap.
Segun kenkuana, malaksid iti ipaay ti lokal a gobierno ket nasaysayaat no adda pay ti nayon gapu ta dakkel ti epekto ti oil spill kadagiti mangngalap.
Inbatadna a kaadoan kadagiti residente iti nasao nga ili ket panagkalap ti pagsapulanda ket saan pay a masinunuo no agingga inton ano ti mapaspasaran nga oil spill gapu ta uray maikkatton ti barko ket posible nga adda pay laeng ti langis.
Malaksid iti daytoy, mamati a dakkel pay ti epektona daytoy iti turismo gapu ta ti kangrunaan a bisbisitaen dagiti turista ket iti La Virgen Milagrosa.
Kabayatanna, kiniddaw met ti Mayor ti ad-adu pay nga anus dagiti residente ken inpasiguradona ti agtultuloy a tulong a maipaay kadakuada.
