LAOAG CITY – Nangipatulod ti tulong ti United Arab Emirates (UAE) para kadagiti komunidad a naapektaran ti napigsa a gingined iti Mindanao.
Karaman kadagiti inpatulodda ket dagiti taraon, relief goods ken suporta kadagiti naapektaran a lugar iti Mindanao.
Gagem ti emergency nga humanitarian response a maipaayan ti alisto a panagbangon dagiti residente iti lugar.
Inbatad ni Dr. Tareq Ahmed Al Ameri, Chairman ti United Arab Emirates Aid Agency a daytoy nga addang ket paset daytoy ti panagtulong kadagiti pagilian a naapektaran ti kalamidad kas ti Pilipinas.
Basar iti National Disaster Risk Reduction and Management Council, umaboten iti 47 ti natay, sumurok 688 ti nasugatan ken rinibribu a residente ti napukawan ti pagtaengan gapu iti gingined a timmama iti asideg ti Sarangani province idi Hunio 8.
Nangipadanon ti pannakipagladingit ken suporta ti nagduduma a pagilian kas ti Estados Unidos, Japan, China, Australia, Germany, France, New Zealand, Israel, Russia ken Ukraine.
Immunan a nangipatulod ti mensahe ti pannakiladingit ni United Arab Emirates President Sheikh Mohamed bin Zayed Al Nahyan ken ni Presidente Ferdinand Marcos Jr. ken inpasiguradona ti suporta iti Pilipinas.
