LAOAG CITY – Nangipila ti kaso kriminal iti Department of Justice (DOJ) ti Bureau of Internal Revenue (BIR) kontra ken ni dati a Bamban, Tarlac Mayor Alice Guo.
Daytoy ket gapu iti pannakapaayna nga agbayad ti umno a buis ken saan a panangipasa ti Annual Income Tax Returns manipud 2019 agingga 2023.
Basar iti Bureau of Internal Revenue, kaso a tax evasion ken failure to file return and pay tax iti babaen ti National Internal Revenue Code ti naipila ken ni Guo gapu iti sumurok maysa a bilyon a pisos a saanna a binayadan a buis.
Nangrugi ti imbestigasion kagiddan ti panagdengngeg iti Senado idi 2024 mainaig iti panang-raid ti POGO hub iti Bamban no sadinno nga inadmitirna a naruay ti sanikuana ken lugan pakairamanan ti pannakainaiganna kadagiti korporasion.
Naduktalan pay ti Bureau of Internal Revenue ti dadakkel a financial transactions, expenditures ken dagiti assets a kukua ni Guo kas kadagiti real properties, lugan, helicopter ken bank transactions ngem awan ti nakita nga inpasana nga income tax returns iti uneg ti lima a nagsasaruno a tawen.
Inbatad ni Bureau of Internal Revenue Commissioner Charlito Mendoza nga agtultuloy a kamaten ti ahensia dagiti tax evader, iligal a negosiante ken dagiti saan nga agbaybayad ti buis.
