LAOAG CITY – Inpakaammo ni Bombo International News Correspondent Rene Ballenas manipud idiay New York, USA a manamnama a maimbitaran iti White House ti New York Knicks kas panangbigbig iti panagballigida iti National Basketball Association Finals.
Daytoy ket kalpasan nga inabak ti Knicks ti San Antonio Spurs iti score a 94-90 iti Game 5 ti NBA Finals.
Segun ken ni Ballenas, adda ti maisayangkat a parada kas panangipakita iti pammadayaw ken suporta kadagiti amin a miembro ti Knicks.
Inbatadna a gapu iti panagballigi ti Knicks ket manamnama ti naruay nga endorsement ti maawat ti franchise-da.
Inlawlawagna a ti Knicks ket inorganisar idi tawen 1946 a nakapartuat ti agkakalaing nga umaayam iti pakasaritaan ti basketball.
Mainaig iti daytoy, naruay a basketball fans idiay New York ti agsalsala kas panangipeksa ti napalaos a ragsakda iti paagballigi ti Knicks.
Kunana a ninamnamanan a mangabak ti Knicks ita a season gapu iti kinalaing ken agresibo dagitoy a panagay-ayam.
Innayonna nga ad-adda pay a pinaneknekan ti Knicks ti kinasiribda kalpasan a nakamatanda ti 29 a puntos a lamang iti Spurs iti maikatlo a quarter.
Immuna iti daytoy, linippas ti Knicks ti serye iti 4-1 ken nagun-odna manen ti Championship kalpasan iti uneg ti 53 a tawen.
