LAOAG CITY – Nangilatang ti Office of the President ti P278 milyon a pundo para kadagiti probinsia ken siudad a nakaro a naapektaram ti magnitude 7.8 a gingined iti Mindanao.
Daytoy ket kagiddan iti panagbisita ni Presidente Ferdinand Marcos Jr. iti Sarangani ken General Santos City tapno personal a kumustaen ti kasasaad dagiti residente ken tingitingen ti kinalawa ti nadadael.
Immawat ti sag-P50 milyon ti Sarangani ken General Santos City.
Nakaala ti sag-P30 milyon ti South Cotabato ken Sultan Kudarat idinto a sag-P20 milyon ti Davao Occidental ken iti ili ti Glan iti Sarangani.
Adda ti nailatang a P15 milyon para iti Zamboanga City idinto nga immawat ti P3 milyon agingga P10 milyon dagiti dadduma pay a naapektaran a lokal a gobierno.
Segun iti Presidente, usaren ti pundo para iti relief operations, panagsubli dagiti kangrunaan a serbisio ken rehabilitasion dagiti lugar a nadadael gapu iti gingined.
Malaksid iti daytoy, nangiparuk-at ti Department of Budget and Management (DBM) ti P100 milyon para iti pannakatarimaan ti city hall ti General Santos City ken sag-P50 milyon para iti Alabel ken Glan para iti rehabilitasion dagiti nadadael a pasdek ken pasilidad.
Inpasigurado ni Presidente Marcos nga agtultuloy ti suporta ti nailian a gobierno agingga a makabangon dagiti komunidad a nakapasar ti didigra.
