LAOAG CITY – Naisayangkat ti bilateral meeting da Presidente Ferdinand Marcos Jr. ken Russian President Vladimir Putin iti sidelines ti Association of Southeast Asian Nations-Russia Commemorative Summit iti Kazan, Russia.
Tinalantan ti dua a lider ti panagpapigsa ti kooperasion iti benneg ti seguridad iti taraon ken enerhia nangruna iti baet kadagiti karit gapu iti rinnupak iti Middle East nga addaan ti epekto iti suplay ken presio ti enerhia kadagiti nagduduma a pagilian pakairamanan ti Pilipinas.
Basar iti report, inimbitaran ni Marcos ni Putin nga agatendar iti Association of Southeast Asian Nations Summit a naikeddeng a maisayangkat inton Nobiembre.
Manarimaan nga adda iti kabisera ti Republic of Tatarstan ni Marcos tapno agpada nga idauloanda ken ni Putin ti Association of Southeast Asian Nations-Russia Commemorative Summit.
Simmangpet ti Presidente iti Russia idi bigat ti Martes ken sinarabo dagiti opisial ti tradisional a Chak-Chak, maysa a nalatak a pastry iti rehion kas paset ti seremonia a panangawat kenkuana.
Iti naisayangkat a summit, manamnama a tingitingen ti lider ti Asian Nations-Russia Commemorative Summit ken Russia ti nagbalin a taray ti 35 a tawen a relasion ken talantanen dagiti addang tapno ad-adda pay a mapapigsa ti kooperasion kadagiti napapateg a sektor kas ti enerhia, seguridad iti taraon, negosio ken panagpuunan.
Gagem ti panagtataripnong a palawaen ti panagtitinnulong iti nagbaetan ti Asian Nations-Russia Commemorative Summit ken Russia tapno masolbar dagiti karit iti ekonomia ken masigurado ti natibtibker a suplay ti taraon ken enerhia para kadagiti pagilian a miembro iti rehion.
