LAOAG CITY – Limitado ti nagbalin a sungbat ni Mayor Rommel Labasan iti ili ti Pinili maipanggep iti kwestionable a kinabaknang daytoy.
Segun kenkuana, nabayagen daytoy nga agserserbi iti nasao nga ili manipud iti panagbalinna a Sangguniang Bayan Member, Bise Mayor agingga a nagbalin a Mayor.
Inbatadna nga iti mano nga unos a tawenna iti pulitika ket adda met ti pakakitaan iti panagtrabtrabahona.
Nupay kasta, silulukat iti opisina ti nasao a Mayor no bilang paimbestigaranda daytoy maipapan kadagiti maipagarup a saan a maiparbeng a sanikua daytoy.
Immuna iti daytoy, adda ti naipatulod a surat ditoy Bombo Radyo Laoag no sadinno a kalikagum ti agrekreklamo a paimbestigaran ti kinabaknang ti nasao a Mayor gapu ta patienna a kwestionable ti inusar ti Mayor iti panagpatakder kadagiti negosiona.
