LAOAG CITY – Agtultuloy a makipaspaset ti delegasion ti Iran iti maiwaywayat maipapan iti kinakappia iti Switzerland pakairamanan ti Estados Unidos basar iti maysa a diplomat nga adda ti direkta nga ammo iti negosasion.
Basar iti nasao a diplomat a nagkedked nga agpabigbig gapu iti sensitibo a banag, nagtalinaed latta iti venue ti panagtataripnong dagiti pannakabagi ti Iran ken awan ti ipaspasimudaag kadagiti mediator a planoda nga ibati ti negosasion.
Gagem ti panagsinnarita a lippasen ti maipatpatungpal a tension ken rinnupak iti Middle East.
Naammoan a ti negosasion ket idadauloan iti babaen dagiti pannakabagi ti Pakistan ken Qatar.
Ti rakurak ket inparuk-at kalpasan nga inpadamag ti sumagmamano a media idiay Iran a maipagarup a timmalawen iti lugar ti summit dagiti negosyador ti Tehran.
Nupay kasta, inlawlawag ti diplomat nga agtultuloy latta a makipaspaset ti delegasion ti Iran iti nasao a summit ken nagtalinaed a nakalukat ti komunikasion iti nagbaetan ti agsinnungbangir a takder kabayatan nga agtultuloy dagiti panangikagumaan tapno magun-od ti maysa a diplomatiko a solusion iti riribok iti rehion.
