LAOAG CITY – Saan a kinumpirmaran ti Philippine National Police a paglikudan ti rakurak ni Senador Rodante Marcoleta a maipagarup a nakaawat isuna ti impormasion mainaig iti posible a panangiparuk-at ti warrant of arrest kontra kenkuana.
Iti maysa a rakurak, inbatad ni Philippine National Police Public Information Office Chief Allen Rae Co a ti panagiyisyu ti warrant ket adda iti hurisdiksion ti korte ken saan a responsibilidad ti pulisia a mangipakaammo iti impormasion maipanggep kadagiti warrant nga iparparuk-at ti korte.
Nupay kasta, inpasigurado ti Philippine National Police nga insigida nga iserbida daytoy a maiyataday iti umno a proseso maiyallubog iti maipatpatungpal a linteg.
Kabayatanna, kuna ni Interior Secretary Jonvic Remulla a sakbay a maaddaan ti arrest warrant, kasapulan pay laeng nga adda ti naipila a kaso iti korte.
Inlawlawagna nga awan ti ammona a kaso a naipila kontra ken ni Marcoleta iti Sandiganbayan a mabalin nga agresulta iti panangiparuk-at ti warrant.
Immunan nga inrakurak ni Marcoleta a nakasagana daytoy a sumuko a nakappia kadagiti otoridad no bilang maarestar.
Daytoy ket mainaig kadagiti reklamo a plunder ken indirect bribery nga ikonkonektar iti maipagarup a saan a panangideklarar ti sumagmamano a campaign contributions manipud kadagiti sumagmamano nga indibidual.
Naiget a naglikudan ni Marcoleta dagiti alegasion ken inpettengna nga ar-aramid laeng dagiti kaso tapno agulimek laeng daytoy.
