LAOAG CITY – Ginutigot ni Senador Robin Padilla dagiti pada na a senador nga ikkan da ti panawen ti pannakaamendar ti Juvenile Justice and Welfare Act ken ibaba ti tawen ti criminal liability iti 10.
Inrakurak daytoy ni Padilla kalpasan ti pammaltog iti maysa a pagadalan iti Tacloban City a nakatayan ti tallo nga estudyante ken nakasugatan ti pito a sabsabali pay.
Nabigbig dagiti suspek nga estudyante nga agtawen ti 14 ken 15.
Iti babaen ti Republic Act No. 9344, dagiti ubbing nga agtawen ti 15 agpababa ket saan a karaman manipod iti criminal liability.
Basar kadagiti otoridad, ti agtawen ti 14 a suspek iti napasamak a pammaltog iti pagadalan iti Tacloban City ket exempted manipod iti criminal liability iti babaen ti Juvenile Justice and Welfare Act, ngem dumalan iti maiyannatop nga interbensyon manipod iti Social Welfare Office.
Kabayatanna, ti agtawen ti 15 a suspek ket ma-evaluate babaen ti City Social Welfare and Development Office, ken no mapaneknekan a daytoy ket nagbasol, maipila ti maiyannatop a kaso kontra kenkuana.
Inpaganetget ni Senador Padilla a nakaad-adon dagiti kapada nga insidente a nakairamramanan dagiti agtutubo, karaman ditoyen ti panagrames, pammapatay, panaghold-up kadagiti pampasahero a jeep ken dadduma pay.
Gapu iti daytoy, kuna ni Padilla a masapol a matratar ti isyu iti special session.
