LAOAG CITY – Apagapaman a ngimmato ti inpatulod a kuarta dagiti Overseas Filipino Worker idi Abril 2026 ngem nairekord met ti kababaan a binulan a remittance iti napalabas a 11 a bulan basar iti Bangko Sentral ng Pilipinas.
Basar iti datos ti Bangko Sentral ng Pilipinas, umabot iti $2.718 bilyon wenno sumurok P164 bilyon ti cash remittances idi Abril, nangatngato ti 2% maidasig iti $2.664 bilyon iti kapada a bulan iti napalabas a tawen.
Nupay kasta, bimmaba daytoy manipud iti $2.874 bilyon a nairekord idi Marso ken daytoyen ti kababaan a balor ti remittance manipud pay idi Mayo 2025.
Malaksid iti daytoy, ti 2% a panagdur-as ket isu met ti kakapsutan a panagngato kadagiti napalabas a tawen.
Iti baet daytoy, umabot met iti $11.398 bilyon ti pakabuklan a cash remittances manipud Enero agingga Abril ita a tawen, nangatngato ti 2.6% maidasig iti kapada a panawen idi 2025.
