LAOAG CITY – Nagballaag ti Philippine Institute of Volcanology and Seismology (PHIVOLCS) iti publiko a nasken a saan a baybay-an ti posible a pannakapasar ti “The Big One” idiay Metro Manila.
Inbatad ni PHIVOLCS Director Dr. Teresito Bacolcol nga agtultuloy a nakabantay dagitoy kadagiti fault line idiay Metro Manila.
Kunana a mapatta-patta a magnitude 7.2 ti agbalin a kapigsa ti “The Big One,” a mangitunda ti nakaro a pannakadadael kadagiti komunidad, imprastraktura ken pagsapulan.
Gapu iti daytoy, pinaigetan ti PHIVOLCS ti information drive ken pannakikoordinar kadagiti lokal a gobierno tapno maammoan ken nalawag a mamarkaan dagiti lugar a pagdaldalanan dagiti fault line partikular ti West Valley Fault.
Nagballaag manen ni Bacolcol a nasken a saan a pagipatakderan ti pagtaengan iti uneg ti lima a metro a kaadayo manipud iti fault line gapu iti peggad nga itunda ti ground rupture no daytoy ket aggaraw.
Kuna ti ahensia a nasken a nakasagana ti tunggal maysa no maaddaan ti gingined nangruna kadagiti residente nga agnanaed iti asideg kadagiti aktibo a fault line.
Mamati ni Bacolcol nga ad-adda nga umdas ti ammo ken kinasagana ti publiko ita maidasig kadagiti naglabas a tawen no bilang marikna ti gingined gapu kadagiti maiwaywayat nga earthquake drill ken panagwaras ti umdas nga impormasion iti tulong ti social media.
