LAOAG CITY – Insingasing ti Department of the Interior and Local Government (DILG) ti posibilidad ti naan-anay a panangipawil kadagiti online video games a naglaon kadagiti kinaranggas.
Inbatad ni Department of the Interior and Local Government Secretary Jonvic Remulla a nasken nga adalen ti Kongreso ken dagiti maseknan nga ahensia ti gobierno ti gakat a total ban iti violent online games para iti proteksion dagiti agtutubo a Pilipino.
Kagiddan daytoy dagiti report a maysa kadagiti suspek iti pammaltog iti maysa a pagadalan idiay Tacloban City ket maipagarup a mahilig iti maysa nga online game a maaw-awagan ti ”GoreBox.”
Basar iti Cybercrime Investigation and Coordinating Center (CICC), ti GoreBox ket maysa nga ay-ayam nga agus-usar kadagiti armas ken agaramid ti nagduduma a scenario nga adda ti pakainaiganna iti kinaranggas.
Temporario a linappeddan ti Cybercrime Investigation and Coordinating Center ti access iti nasao nga ay-ayam iti pagilian kabayatan a matingtingiting ti epekto daytoy.
Mainaig iti daytoy, inpakaammo ti Department of the Interior and Local Government, mabalin nga ipatungpal ti kapada nga addang kontra kadagiti dadduma pay nga online games nga adda ti kapada a linaon.
Kuna ni Secretary Remulla a mabalin a maaddaan ti epekto ti paulit-ulit nga exposure dagiti agtutubo iti naranggas a content ken nasken nga adalen no kasano a makaapektar iti ugali ken panunot dagitoy.
Nupay kasta, agtultuloy ti panangtalantan dagiti eksperto no kasano ti kadakkel ti epekto ti violent video games iti aktual a garaw ti maysa a tao.
