LAOAG CITY – Naburak ti maysa nga skateboarder ti bukod na a titulo iti Guinness World Record kalpasan a nagbiyahe manipod California agingga ii Florida iti uneg ti 39 nga aldaw babaen laeng ti panaglugan na ti skateboard.
Ni Chad Caruso ket nagdalyasat iti nasurok a 3 ribo a milya manipod iti Venice Beach, California agingga iti Jacksonville Florida iti nagbaetan ti Mayo 1 agingga iti Hunyo 8 no sadinno nga addaan ti average a 72 a milya iti kada aldaw.
Ni Caruso, a nakairekord ti panagdalyasat na iti YouTube, ket datin a nag-skate manipod Venice Beach agingga iti Virginia Beach, Virginia iti uneg ti 57 days, 6 hours ken 56 minutes idi 2023, a nakagun-odan na ti Guinness World Records title para iti “fastest crossing of America on a skateboard”.
Inbatad na a ti skateboarding ket banag a nangiyadayo kenkuana iti riribok, agsipud daytoy lattan ti ar-aramiden ken nakaitutukan ti atensyon na.
Inpakaammo na a ti nagbalin nga addang na ket tapno makaukkon ti kwarta para iti Natural High, maysa nga organisasyon a mangal-allukoy kadagiti ubbing nga agbalin nga aktibo ken adaywan ti droga ken alcohol.
