LAOAG CITY – Inpakaammo ni Ms. Chariz Garma, ti mangidadaulo iti Department of the Interior and Local Government ditoy suidad ti ciudad ti Laoag nga adda manen ti lima a barangay ti naideklarar kas drug cleared barangay ditoy ciudad.
Daytoy ket kalpasan iti naiyuswat a 2nd Quarter City Peace and Order Council Meeting.
Kunana a basar ti kumpirmasion ti Provincial Drug Enforcement Agency, Philippine National Police, City Health Office, Barangay Anti-Drug Abuse Council ken dadduma pay nga ahensia ti gobierno, maibilangen a drug cleared barangay iti Brgy. 22, San Andres; Brgy. 25, Santa Cayetana; Brgy. 28, San Bernabe; Brgy. 42, Apaya ken Brgy. 62-B, Navotas South.
Inbatad na a kadagupan iti 80 a barangay ditoy ciudad ti Laoag, ket addan ti 60 a drug cleared, 2 ti drug free ken 18 laengen ti saan pay a nadalusan manipod iti illegal droga.
Inpasingked met ni Garman nga agtultuloy ti kampania ditoy ciudad ti Laoag tapno mapasardengnaan-anay a maparmek wenno mapukaw ti illegal a droga.
