LAOAG CITY – Inrakurak ti Iran a determinado a mangikalintegan ti soberenya da kalpasan ti kaudian nga airstrikes ti Estados Unidos iti sumagmamano a pasilidad ti surveillance iti south coast ti pagilian.
Iti opisyal nga statement ti Iranian foreign ministry,naiget a kinondenar na ti panagatake nga inawagan na ti “US terrorist army” ken inpetteng na nga itultuloy da ti mangilaban ti teritoryo da kontra iti aniaman a panagraot.
Kabayatanna, nagtalinaed a nakabitin ti narukop a ceasefire iti baet ti gubat iti middle idinto nga agtultuloy nga agtintinnudo ti Iran ken Estados Unidos iti maipagarop a naglabsing iti katulagan.
Nagballaag met ni Foreign Minister Abbas Araghchi nga aniaman a karit iti control ti Iran iti Strait of Hormuz ket mangitunda ti nakarkaro a tensyon, aglalo ket adda ti agdama a negosasyon para iti kapia.
Segun kenkuana, ti aniaman a pananggandat a mangipatungpal ti pannakadadael ti katulagan a saan a maiyataday iti agdama a memorandum of understanding ken mangpakaro laeng ti sitwasyon ken mangitunda ti pannakaitantan ti panaglukat manen ti strait of hormuz.
Nagpanawagan ni Araghchi iti amin a partido nga agtalinaed a napudno iti katulagan ken saan nga itulok a mailiklik ti proseso.
