LAOAG CITY – Kiddawen ni Ombudsman Jesus Crispin Remulla iti Sandiganbayan nga ikkaten ni dati Department of Public Works and Highways (DPWH) Secretary Manuel Bonoan kas akusado kadagiti kaso a sangsangwen na mainaig iti maipagarop a P573 milyon a kickback manipod kadagiti flood control project.
Sumangsango ni Bonoan iti kaso a plunder nga agbalor ti P573 milyon.
Kadwa na kas akusado da Senador Jinggoy Estrada, dati a Department of Public Works and Highways-National Capital Region Assistant District Engineer Denryl Caesar Sanchez Cortuna, DPWH NCR District Engineer Manny Bumagat Bulusan, ken DPWH NCR District Engineer Arturo Lombres Gonzales Jr.
Agdama a nakapenpen ti nasao a kaso iti Fifth Division ti Sandiganbayan.
Karaman pay ni Bonoan iti kaso a dua a counts ti graft wenno panagkunniber a sangsangwen met ni Estrada.
Awan ti piyansa iti kaso a plunder ken agdama a naka-ospital arrest ni Bonoan gapu kadagiti sagsagabaen na a sakit.
Naamoan a karaman kadagiti sakit ti dati a sekretaryo ket ti diabetes, hypertension, acute coronary syndrome, chronic kidney disease, prostate cancer, wenno panagsaksakit iti spine.
