LAOAG CITY – Indeklarar ti World Health Organization (WHO) ti panaglippas ti hantavirus outbreak mainaig iti maysa a cruise ship kalpasan a nakumpleto ti naudi a nairekord a na-exposed iti sakit ti quarantine ken nagnegatibo iti virus.
Basar iti World Health Organization, umabot iti 13 nga indibidual ti naakaran iti outbreak idinto a tallo ti natay.
Ti outbreak ket naikonektar iti Andes virus, maysa a naidumduma a klase ti hantavirus a masansan a masarakan idiay Argentina ken Chile.
Nangrugi ti insidente kalpasan a timmalaw ti cruise ship nga MV Hondius manipud idiay Argentina idi Abril 1.
Naammoan a kadagiti simmaruno a lawas, nakairekord dagiti kaso ti sakit kadagiti pasahero ken crew a saan a nagbayag ket na-trace ken naipadalan iti monitoring ken quarantine.
Inbatad ti World Health Organization a kalpasan ti negatibo a resulta ti naudi a na-exposed iti sakit ken panaglippas ti quarantine period ket awan ti naduktalan a baro a kaso ti hantavirus isut gapuna nga opisialen a linippas ti outbreak.
Ti hantavirus ket maysa a sakit a maiyakar iti tao manipud kadagiti ayup partikular iti babaen ti exposure iti isbo, rugit wenno katay dagiti infected a bao a mabalin a mangitunda ti nakaro a respiratory illness.
