LAOAG CITY – Umaboten iti 2,025 nga indibidual ti excess deaths idiay France gapu iti mapaspasaran nga heatwave iti Europa a nangrugi iti maudi a paset ti Hunio basar iti public health officials.
Adda ti 30 a porsiento daytoy a nangatngato maidaisig iti napalabas a lawas.
Inbatad ni French Health Minister Stéphanie Rist a maobserbaran ti panagngato ti bilang dagiti pimmusay iti tawen nga 45 agpangato.
Nadakamat nga idi Hunio 24, nairekord ti France ti kababaraan nga aldaw iti pakasaritaan ti pagilian no sadinno nga umabot iti agarup 41 degrees Celsius ti temperatura iti Paris idinto a naipadalan iti red heat alert ti kagudua ti pagilian.
Manamnama nga umabot manen iti 40 degrees Celsius ti temperatura iti abagatan a paset ti France idinto a nangiparuk-at ti gobierno ti red alert status gapu iti pangta ti forest fires.
Basar iti datos, addan ti 7,000 nga uram ti nairekord sipud nangrugi ti panawen ti kalgaw a nakauraman ti sumurok-kumurang 8,700 nga ektaria ti daga iti pagilian.
Kabayatanna, rinibribu a residente ti naibakwit kalpasan ti panagwaras ti wildfire.
