LAOAG CITY – Napasaran ti Cuba ti nalawa a power outage kalpasan a bimmagsak ti national electric grid daytoy.
Segun iti grid operator ti Cuba nga UNE, kellaat a nag-collapse ti sibubukel nga electrical system ti pagilian isut gapuna a nagpukaw ti kuryente ti mapatta-patta a 10 milyon a tattao.
Im-imbestigaran dagiti otoridad ti namunganayan ti total blackout ngem nabayagen a problema iti pagilian ti kanayon a power outages.
Naammoan a kadagiti naglabas a bulan, makapaspasaren ti Cuba ti sumagmamano nga oras agingga iti sumagmamano nga aldaw a brownout gapu iti daan a power infrastructure ken kinakurang iti gasolina para kadagiti planta ti kuryente.
Ad-adda pay a kimmaro ti situasion gapu iti krisis iti ekonomia ken limitado a suplay ti enerhia.
Maipalagip a sakbay pay a nag-collapse, agarup 2/3 ti pagilian ti awan ti kuryentena.
Naruay a Cubano ti naapektaran gapu iti kinabara ti panawen ken marigatan iti inaldaw-aldaw nga aramid kas ti panagtrabaho ken panagadal.
