LAOAG CITY – Imbilin ti Senate Impeachment Court ti panangiparuk-at ti supboena kontra kadagiti dua nga opisial ti National Bureau of Investigation (NBI) tapno mangipaay ti rakurakda iti panangusig mainaig iti Article IV ti impeachment case kontra ken ni Vice President Sara Duterte.
Mainaig iti daytoy, pinalubusan ni Presiding Officer Sen. Francis “Chiz” Escudero ti kiddaw ti prosekusion a paayaban dagiti dua nga NBI Regional Director Atty. Jeremy Lotoc ken Senior Agent John Mark Calilung kas testigo.
Inbatad met ni House Prosecution Spokesperson, Robert Ace Barbers a napateg ti testimonia dagiti dua nga opisial tapno mapaneknekan dagiti alegasion maipapan iti Article IV ti Articles of Impeachment.
Bayat iti daytoy, sakbay a naaprubaran daytoy ket innikan met ni Escudero ti tsansa ti depensa ti rakurakda.
Pinaboran met ti impeachment court ti mosion a mangiparuk-atda ti subpoena ken testificandum ken duces tecum kontra kadagiti dua nga opisial ti nadakamat nga ahensia.
Basar iti korte, manamnama a makipagpaset dagiti dua nga opisial ken agbalin a testigo bayat iti prosekusion a panagtalantan iti Article IV ti impeachment complaint.
