LAOAG CITY – Rinaot ti Islamic Revolutionary Guard Corps (IRGC) ti Iran dagiti base militar ti Estados Unidos iti Kuwait ken Bahrain.
Inaramid daytoy ti Iran kas panagibales kadagiti baro a serye ti panagatake ti Amerika iti southern coastal provinces na ken dua a rangtay iti eastern Iran.
Agpada a kinumpirmaran ti Navy ken Air Force ti Islamic Revolutionary Guard a nangiwayat da ti joint drone ken missile attack kadagiti imprastruktura ken pasilidad ti Estados Unidos.
Karaman ditoy ti Camp Arifjan and Ali Al Salem Air Base iti Kuwait ken Shaikh Isa Air Base and Juffair iti Bahrain.
Ti Juffair ket pagtaengan para iti Naval Support Activity, ti kangrunaan nga US Navy base iti Persian Gulf, nga aghohost iti US Fifth Fleet.
Iti agdama, awan pay ti detalye no adda dagiti nasugatan wenno natay iti nasao a panagatake kadagiti base militar ti Amerika.
