LAOAG CITY – Agsagsagana dagiti pagilian a Taiwan, China ken Japan iti manamnama nga idadalyasat ti Typhoon Inday nga addaan ti International name a Bavi a posible a mangitunda ti nakaro a panagtudo ken panagangin iti rehion.
Basar kadagiti weather authorities ti Taiwan, possible a mangitunda ti bagyo ti agingga maysa a metro a tudo iti sumagmamano a lugar.
Mainaig iti daytoy, sumurok 29,000 a suldado ti nakabantay tapno tumulong kadagiti posible a rescue ken relief operaions.
Nagballaag dagiti otoridad iti pagilian ti China a mabalin a dakkel ti agbalin nga epekto ti Typhoon Bavi no tumama daytoy iti paset ti Fujian.
Kasta met dagiti residente ti Japan pakairamanan ti lugar ti Sakishima Island,a manamnama a pagdalyasatan ti bagyo.
Kabayatanna, kinanselar met dagiti sumagmamano nga airlines ti ginasut a biahe mainaig iti madi a paniempo. karaman dagitoy dagiti Japan Airlines, All Nippon Airways, Thai Airways ken Malaysia Airlines a nakaapektar kadagiti rinibu a pasahero.
