LAOAG CITY – Natay ti dua nga indibidual idinto a tallo ti nasugatan kalpasan ti pammaltog nga asideg iti maysa nga street festival idiay Toronto, Canada.
Basar iti Toronto Police, napasamak ti insidente iti paset ti St. Clair Avenue West ken Arlington Avenue no sadinno a manarimaan nga isaysayangkat ti Salsa on St. Clair festival a maysa a panagrambak iti kultura dagiti Latino.
Insigida a nagresponde dagiti otoridad ken nabirokan ti lima a biktima nga addaan ti tama ti bala.
Gapu iti daytoy, nagballaag ti pulisia iti publiko a liklikan ti lugar kabayatan a maiwaywayat ti operasion kontra iti suspek.
Iti agdama, awan pay ti impormasion ti Toronto Police mainaig iti pakabigbigan ti suspek wenno no addan ti naarestar maipanggep iti insidente.
Napasamak ti insidente sumagmamano a lawas kalpasan ti maysa pay a nadara a panangatake iti Montreal no sadinno a dua nga indibidual pakairamanan ti maysa a pulis ti natay kalpasan a pinaltu-paltogan ti suspek a saan a nagbayag ket napapatay met isuna dagiti otoridad.
