LAOAG CITY – Inadmitir ni Angelica Panganiban a saanna a kayat a mairaman pay iti social media ti anakna a ni Amila Sabine isu a nagdesision isuda ti asawana a ni Gregg Homan nga isardengen ti YouTube channel-da.
Nupay kasta, inbatad ni Angelica a sitatallugod isuda nga agasawa nga agaramid ti endorsements ti anakda.
Inlawlawagna a kumanunong isuda iti gakat mainaig iti social media ban kadagiti agtawen ti 15 agpababa tapno maliklikan ti cyberbullying ken sensitibo a content.
Kunana nga inpawilda ti panagusar ti gadget ken ni Amila nga agtawen ti uppat.
Innayonna nga adda met ti iPad ti anakna ngem ipapausarda laeng no manarimaan nga iyur-urnos ti buok ti anakna ken no agbuybuya kadagiti educational videos.
