LAOAG CITY – Inrakurak ni Lead Prosecutor Gerville Luistro a saanen nga ipresentar ti House prosecution panel ti sumagmamano a naikeddeng a testigo iti impeachment trial ni Vice President Sara Duterte.
Daytoy ket mainaig iti Impeachment Article IV a pakatrataran ti maipagarop a pangta ti bise presidente kada Presidente Ferdinand Marcos Jr., First Lady Liza Araneta Marcos ken dati nga Speaker Martin Romualdez.
Karaman kadagiti saanen a maipasango pay iti trial ket ti mangibagi manipod iti Philippine National Police Firearms and Explosives Office (PNP FEO), agirakrakurak a ni Mikhail Flores ken Bonz Magsambol, Sheriff Abe Andres, maysa a kabagyan ti biktima ti panagpangta ken maysa a psychiatrist.
Segun ken ni Luistro, ni National Bureau of Investigation (NBI) Director Melvin Matibag ti agbalin a maudi a testigo ti prosecution para iti Article IV.
Namnamaen a ti testimonya na ti mangipaay ti pakabuklan a makailawlawag kadagiti alegasyon ti pangta iti biag ni Presidente Ferdinand Marcos Jr., first lady Liza Marcos, ken dati nga House Speaker Martin Romualdez a naipalaon iti impeachment complaint.
Ti desisyon ti prosecution nga agkissay iti testigo ket makitkita nga addang tapno ad-adda a mapaalisto ti panagdengngeg ken maitutuk ti atensyon kadagiti kangrunaan nga ebidensya ken testimonya a direkta nga adda ti pakainaigan iti kaso.
