LAOAG CITY – Agtultuloy a mabirbirok ti sumurok 500 nga indibidual kalpasan a naarinebneb ti naglugananda a dua a bangka idiay Myanmar.
Basar iti United Nations, napukawan ti komunikasion ti umuna a bangka nga adda ti sumurok 250 nga indibidual ti nakalugan idinto a ti maikadua met a bangka ket naarinebneb iti Ayeyarwady coast nga adda ti 280 a pasahero.
Naammoan a kaadoan kadagiti tripulante ket refugee manipud iti Rohingya Muslim minority.
Segun iti United Nations High Commissioner for Refugees (UNHCR) ken International Organization for Migration (IOM), nagbiahe dagiti bangka iti ruar ti “regular sailing season,” kabayatan a narisgo ti panawen nga agturong iti taaw.
Maipalagip a masansan nga agluglugan dagiti Rohingya kadagiti bangka tapno makalibas iti gubat idiay Myanmar.
Immuna iti daytoy, gagem dagiti nakalugan iti dua a bangka a makadanon idiay Malaysia, Indonesia wenno Thailand para iti nakapkappia a panagbiag.
Kabayatanna, nagpanawagan ti United Nations ti naig-iget a search and rescue efforts iti panangbirok kadagiti maseknan a nakalugan iti naarinebneb a bangka no sadinno nga awan pay ti kumpirmasion no adda ti natay kadakuada.
