LAOAG CITY – Kinumpirmaran ni House prosecution legal spokesperson Atty. Benjamin “Jay” Tolosa Jr. a manamnama a mangiparuk-at ti napateg nga impormasion ni National Bureau of Investigation (NBI) Director Melvin Matibag iti panagsangona kas witnesss stand ti senate impeachment court mainaig ti nagbalin a pangta ni Vice President Sara Duterte nga adda ti kinasaritana a maipagarup nga hitman tapno papatayen ni Presidente Ferdinand “Bongbong” Marcos Jr.
Segun ken ni Tolosa, ti testimonia ni Matibag ket naidumduma manipud kadagiti naglabas a testigo nga isuda NBI Senior Agent John Mark Calilung at NBI Regional Director Atty. Jeremy Lotoc a nangiggem iti authentication ti kontrobersial a video ken ti inwayat nga imbestigasion ti cybercrime division.
Iti testimonia ni Lotoc, namin-ano a sinaludsod ti depensa no ana dagiti addang nga inwayat ti National Bureau of Investigation (NBI) tapno maamoan ti assassin a nadakamat iti online press conference ni Dutrte idi Nobiembre 23, 2024.
Inbatad met ni Tolosa nga inlawlawag ni Lotoc a ti saludsod ket saanen a karaman ti imbestigasion ti Cybercrime Division gapu ta adadda a nasaysayaat no intelligence unit ti National Bureau of Investigation (NBI) ti agsao mainaig iti daytoy.
