LAOAG CITY – Nagipatulod manen ti presko a saba wenno cardava ti Pilipinas idiay Auckland, ti maikadua a commercial shipment a nagpatibker iti pundasion ti pagilian iti New Zealand ken senyales a makaal-ala ti atension iti world market ti prutas a masansan nga idasar iti kusina dagiti Pilipino.
Ti kaudian a shipment ti Avante Agri-Products Philippines Inc. a naka-base idiay Davao City ket kagiddan ti balligi a panagsangpet ti umuna nga export daytoy kadagiti immuna a bulan ti tawen, maysa a balligi a nangpapigsa iti kumpiansa dagiti buyer ken nanglukat iti ridaw para iti regular orders manipud idiay New Zealand.
Ti shipment ket maysa a 40-foot refrigerated container nga adda ti kargana a 1,400 boxes ti export-quality a presko a saba nga agturong iti Fresh Produce Group NZ Ltd.
Naammoan a kada karton ket naglaon ti 12 kilograms ti prutas, naannad a binungon ken nakaikabil iti palyeta tapno mapreserbar ti panagbalin a presko iti sibubukel a panawen ti biahe kabayatan a solsolbaren ti naiget a pagannurotan iti food safety ken plant quarantine ti New Zealand.
