LAOAG CITY – Naamoanen ni Senador Panfilo “Ping” Lacson ti maipagarup bagman ni Senador Alan Peter Cayetano nga adda iti likod ti maipagarup ghost flood control projects iti Taguig City.
Segun kenkuana, ti maipagarup a bagman ni Senador Alan Peter Cayetano ket pakairamanan dagiti kompanya nga indauloan dagiti agasawa a kontratista a da Curlee ken Sarah Discaya.
Mainaig iti daytoy, saan a dinakamat ni Lacson no siasinno ti naamoanna nga indibidual ngem impasiguradona nga agtultuloy ti panangimbestigarda para iti kanayonan pay a detalye mainaig iti maipagarup a bagman ni Cayetano.
Immunan nga inakusaran ni Lacson ti maysa a Taguig engineer gapo ti panangiyakarna ti agarup P500 million babaen ti maysa a casino iti Metro Manila a kukua dagiti dua nga alias.
Kabayatanna, inbatad ni Lacson a naduktalan ti grupona a dagiti proyekto iti Taguig manipud iti tawen 2020 no sadinno ket nagbalin ni Cayetano kas House Speaker ket nakalista iti St. Timothy ken St. Gerard nga agpada a construction firms a kukua dagiti agasawa a Discaya ngem inimplementar daytoy ti sabali a partido.
Iti baet daytoy, inlanad ni Lacson a dagiti anomalia kadagiti proyekto ket paset ti dakdakkel a kickback scheme.
Gapo iti daytoy, impasigurado ni Lacson ti naiget a panagimbestigarda tapno mapaneknekanda nga adda ti ghost projects iti Taguig.
Kabayatanna, naglikudan ni Cayetano nga adda ti ghost project iti siudad ken dinakamatna nga awan ti naipila a kaso kontra kenkuana mainaig kadagiti alegasion kenkuana.
