LAOAG CITY – Sinungbatan ni Senate Minority Leader Alan Peter Cayetano ni Senador Panfilo Lacson kalpasan ti panangliklikna iti imbitasionna nga inspeksiunin ti flood control projects iti Taguig.
Segun ken ni Cayetano, saan a masapol nga ikadanag ni Lacson ti panaglayus iti Taguig gapu iti dakkel a panagdur-as ti flood control iti siudad.
Inbatad ni Cayteno a nabayagen a maipaspasdek dagiti flood control projects iti Taguig gapu ta segun kenkuana, nangrugi ti dadakkel a plano idi panawen pay laeng ti Martial Law, naipatungpal ti road dike idi tawen 2001, naipalawa daytoy idi administrasion ni Aquino ken idinto a ti manarimaaan a madildillaw ket narugian idi administrason ni Duterte.
Inpetteng ni Cayetano a malaksid kadagiti nakaro a panagtudo, manmano laengen dagiti lugar a makapaspasar ti flash floods iti Taguig kumparar kadagiti dadduma pay a siudad iti Metro Manila.
Malaksid iti isyu ti flood control, inbatad pay ni Cayetano a makapasiddaaw nga isuna laeng ti target ni Lacson ken maisilsilpo kadagiti alegasion iti Taguig.
Nupay kasta, inpanagetgetna nga isentrona ti bagina kadagiti isyu nga adadda a makaapapektar iti publio kas kadagiti panagngato ti presio dagiti magatang ken kuryente ken kadagiti dadduma pay ng isyu ti ekonomiya.
