LAOAG CITY – Manamnama a maisayangkat ti Provincial Earthquake Drill inton Hulio 29.
Segun ken ni Mr. Marcell Tabije, Local Disaster Risk Reduction and Management officer ti Provincial Government of Ilocos Norte, paset daytoy iti kalikagum ni Gov. Cecilia Araneta Marcos a kaadda ti regular a maisayangkat nga earthquake drill ditoy probinsia.
Inlawlawagna a napanunutan daytoy ti gobernador gapu iti kaadu dagiti nagbalin a biktima iti napasamak a napigsa a gingined iti umabagatan a paset ti pagilian
Inbatadna a kalikagum ti gobernador a makapagsagana ti probinsia gapu ta awan ti makaammo no sadinno ti pakapasamakanna.
Kuna ni Tabije a kalpasan a naisayangkat ti second quarter earthquake drill iti Gov. Roque B. Ablan Sr. Mem. Hospital ket tarigagayna a dagiti pagadalan ti maisaruno a pakaisayangkatan ti earthquake drill.
Kunana a nupay adda dagiti earthquake drill nga isaysayangkat ti Department of Education kadagiti pagadalan ket kalikagum ni Gov. Marcos a regular a maisayangkat daytoy tapno maimula iti panunut dagiti agad-adal no ania dagiti nasken a maaramid no adda ti mapasamak a gingined.
Inpakaammo ni Tabije a kalikagum ti gobernadora nga aggigiddan a maisayangkat ti earthquake drill iti elementaria, sekondaria ken kolehio iti pampubliko man wenno pribado a pagadalan.
Innayonna a manarimaan ti koordinaasionda kadagiti tallo a division ti Department of Education ditoy probinsia, Mariano Marcos State University ken kadagiti dadduma pay a pagadalan.
