LAOAG CITY – Inpakaammo ni Atty. Chariot Malicad, ti officer in-charge ti Business Licensing and Permit Office (BPLO) ditoy siudad ti Laoag a pinaserraanda ti dua a water station ditoy siudad ti Laoag kalpasan a nakapasar ti Acute Water Diarrhea dagiti agus-usar kadaytoy.
Kunana nga immunan iti daytoy ket adda ti rekomendasion ti City Health Office (CHO) a dagiti nasao a water stations ket saan a sumursurot iti monthly wenno ti quarterly water testing.
Gapu iti daytoy, insigida a nagturong ti Business Licensing and Permit Office (BPLO) kadagiti nasao a pasdek negosio ket ditoy a naduktalan nga awan ti business permit dagitoy a rason a naipaayanda ti umuna a notice of compliance.
Kunana a kalpasan ti sumagmamano nga aldaw, nakaawat manen ti opisinada ti report manipud ti City Health Office (CHO) nga adda dagiti indibidual a makapaspasar ti diarrhea a nangitunda ti pannakapaserra dagiti nasao a water stations.
Mainaig iti daytoy, naduktalan ti City Health Office (CHO) a dagiti dua a water stations ti gapu na a makapaspasar ti diarrhea dagiti nasao nga indibidual.
Kuna ni Malicad a maibilang daytoy a risgo ti public health isu a saan da a kasapulan ti mangipaay pay ti maikadua wenno maikatlo a notice of compliance.
Kabayatanna, kunana nga inaprobaran ti Local Chief Executive ti pannakaipaay ti closure permit isu nga insigida a pinaserraanda daytoy.
