LAOAG CITY – Kalikagom ti Business Permit and Licensing Office ditoy ciudad ti Laoag a maiyadayo dagiti amusement establishment kas iti bar, pagbilyaran, club ken dadduma pay kadagiti institutions wenno pagadalan ditoy ciudad.
Segun kenni Atty. Charito Malicad, mangidadaulo ti Business Permit and Licensing Office, adda ti national law a mangibagbaga a masapol a 50-meter ken 100-meter radius ti distansia dagiti sumagmamano nga establisimiento manipud kadagiti pagadalan.
Nupay kasta, kunana a saan pay a nalawag no adda ti partikular nga ordinansa ti ciudad maipanggep iti daytoy, isut gapuna a mangaramid pay ti Business Permit and Licensing Office iti inventory kadagiti establisimiento tapno makita dagiti lokasyon ken ma-check ti compliance dagitoy.
Kuna na a no adda negosyo a maammuan da a saan a sumursurot iti naibaga a distansia, ket masapul nga umuna ti due process.
Mabalin a ma-notify dagiti apektado a negosyo ken maited kadakuada ti gundaway a mangikorehir iti aniaman a saan nga umiso a proseso iti operasyon.
Kabayatanna, inpaganetget ni Atty. Malicad a ti panagmonitor da ket maipakat iti amin a klase ti negosyo, tapno masigurado ti pannakasurot dagiti paglintegan.
