LAOAG CITY – Inlawlawag ti Philippine Postal Corporation (PHLPost) a saan kasapulan ti valid government-issues ID tapno makaaplikar para iti Postal ID.
Segun ken ni Postmaster General ken Chief Executive Officer Maximo C. Sta Maria III, mabalin a makaala ti ID basta adda ti birth certificate, barangay certificate ken proof of address kas ti bill ti kuryente, danum wenno kuryente, basta sigurado a nakanagan daytoy iti aplikante.
Gagem daytoy ti umno nga ikorihir ti pammati a kasapulan pay laeng nga adda ti sabali a government-issued ID sakbay a makaala ti Postal ID.
Kunana a kalikagum ti Postal ID nga agserbi kas umuna a government-issued identification dagiti Pilipino ken aramiden a nalaklaka ti pammaneknek ti identidadda.
Kabayatanna, ti Postal ID ket aw-awaten ti adu a transaksion iti publiko ken pribado a sektor pakairamanan ti panaglukat ti bank account, panagaplikar ti pasaporte, panagala dagiti parcel ken dadduma pay a legal ken pinansial a transaksion.
Nakalukat ti Philippine Postal Corporation (PHLPost) iti oras ti alas-8 ti bigat agingga iti alas-5 ti malem kadagiti branch dagiti mall manipud Lunes agingga Biernes.
