LAOAG CITY – Inlawlawag ni Engr. Cynthia Iglesia iti PAG-ASA DOST iti Laoag International Airport no apay nga alisto a ngimmato ti lebel ti danum kadagiti nagduduma a lugar ditoy probinsia.
Segun kenkuana, ti normal a rainfall count iti bulan ti Hulio ket 478.9 , ken manipod idi hulio uno agingga idi hulio 23 ket 95.1 mm pay laeng ti nai-record-da.
Nopay kasta, ita nga aldaw, Hulio 24 manipod itay alas otso agingga itay alas-sais itay bigat ket nakairekorddan ti 180.8 mm a rainfall a kayatna a saoen ket naguduan ti normal a rainfall count ken maibilang a maika-15 nga aldaw koma a tudo ti bilangna ita.
Innayonna, a malaksid iti daytoy bagyo Kiyapo a mangap-apektar ita ti probinsia ket posible pay nga umabot ti sumurok 200mm gapu iti pannakaigiddan ti habagat.
Namunganay daytoy a palawag ti state weather Bureau kalpasan nga ado dagiti nagsiddaaw nga alisto ti panagngato ti danum bayat ti iduduprak ti Bagyo Kiyapo.
